Hating kapatid

HATING KAPATID 

hating kapatid ang mga alaga

sa natirang bangus, balat ng isda

at pinagmasdan ko silang may tuwa 

kaya may naihanda akong tula

pusang alaga sa bahay na ito

pagala-gala't natutulog dito

kaya napagpasyahan kong totoo 

katapon sila pag nagluto ako

bagamat minsan, sila'y nag-aaway

inaawat ko naman silang tunay

awayan nila'y ikinalulumbay

buti't sila'y nagiging mapagbigay

mabuti't alaga'y hating kapatid 

upang sa gutom sila'y di mabulid

- gregoriovbituinjr.

08.31.2024

* mapapanood ang bidyo sa kawing na: https://fb.watch/uithLmOvd3/     

Buhay-kalye

 

BUHAY-KALYE

kaytindi ng kahirapan sa buhay-kalye

na upang makakain ay pulos diskarte

nang sa pangangalakal sila'y maitaboy

aba'y lalo silang nagmistulang palaboy

dati'y nakakakain pa sila ng pagpag

ngunit ngayon, gutom sila buong magdamag

dukhang walang lamon, sikmura'y kumakalam

habang ang mayamang aso'y busog sa ulam

dapat pagbutihin ang pagkakawanggawa

mulatin at organisahin silang dukha

ipakitang sila'y may magagawa pa rin

kung kikilos sila'y may ginhawang kakamtin

bahaghari'y lilitaw matapos ang unos

di lahat ng panaho'y panahong hikahos

may araw ding sisilay matapos ang bagyo

mabubusog din sa kangkong na inadobo

- gregoriovbituinjr.

08.30.2024

* larawan mula sa magasing Liwayway, Agosto 2024, pahina 29, kung saan nakasulat sa malalaking letra: "Naisip ni Biboy, sana ay hindi na niya kailangang umasa sa mga itinapong pagkain ng iba. Iyong sana ay masaya ring kasama ang kaniyang ama't ina. At sana ay hindi na niya kinakailangang umasa sa sariling diskarte para malamnan ang sikmura."

Pag-utos sa pagpaslang

PAG-UTOS SA PAGPASLANG

hinggil sa War on Drugs, nakakagimbal na pag-amin

utos noon ng hepe ng pulisya na patayin

ang umano'y mga suspek sa droga, at lipulin

ang ilegal na droga't tuluyan itong durugin

mga pagpaslang ay utos daw ni Senador Bato

noong ito pa'y hepe ng pulis sa bansang ito

iyon ang pahayag sa Kongreso ni Espenido

na natalagang hepe ng pulis sa Leyte mismo

habang kalaban sa drug war campaign ay tinutugis

sa tanong kay Espenido'y sinagot nang mabilis

pag sinabi raw na mawala, sa lenggwaheng pulis

kasali raw ang pagpaslang upang droga'y mapalis

maganda namang mawala ang droga at malipol

ang mga sindikato ng drogang nakakaulol

ngunit kayrami raw inosenteng dito'y nasapol

pinaslang, walang proseso, krimen itong masahol

ang mga kamag-anak ng inosenteng biktima

ng pamamaslang ay nananawagan ng hustisya

kung may kasalanan ay ikinulong na lang sana

ang mga mahal nila sa buhay, sana'y buhay pa

- gregoriovbituinjr.

08.29.2024

* ulat mula sa pahayagang Pang-Masa, Agosto 29, 2024, headline at pahina 2

Panimdim

PANIMDIM

mabuhangin man ang lupa

mga putik ay sariwa

sinta, ikaw pa ring sadya

ang iibigin kong lubha

langit man ay makulimlim

bulaklak mo'y masisimsim

pagkagat ng takipsilim

ikaw ang nasa't panimdim

mamahalin kitang tapat

kahit tamaan ng kidlat

lalo't kaisa kang mulat

sa mundo kong parisukat

kahit malalim ang ilog

sisisirin kita, irog

di hahayaang lumubog

sarili ko'y ihahandog

- gregoriovbituinjr.

08.29.2024

* larawan mula sa google

Pulang tshirt

PULANG TSHIRT

mare-redtag ba ako kung suot ko'y pula?

o dahil simbolo ng pag-ibig ang pula?

di ba't watawat ng Katipunan ay pula?

di ba't sa bandila ng Pinas ay may pula?

tatak ng tshirt ni misis ay Baguio City

na noong naroon kami'y aming nabili

tatak naman ng tshirt ko ay Ka Leody

suot ko nang tumakbo siyang presidente

bughaw ang kulay ng langit at karagatan

luntian ang bundok, parang, at kabukiran

puti'y kapayapaan, itim ay karimlan

pula ang dugo ng sinumang mamamayan

sa kulay ng dugo makikitang malusog

kulay din ng galit at digmaang sumabog

kulay ng tapang upang bansa'y di madurog

salamat sa kulay pulang sa atin handog

- gregoriovbituinjr.

08.28.2024

Di lang palay kundi talbos

DI LANG PALAY KUNDI TALBOS

di lang palay ang tinutuka kundi talbos

ng sayote, mabuti't nagagawang lubos

halimbawang sa patuka na'y kinakapos 

kayraming talbos na di agad mauubos

pag nasa lalawigan, manok ay malaya

subalit kinukulong pag nasa Maynila 

kaya dito sa bundok ay pagala-gala

sila na ang naghahanap ng matutuka

paggising sa umaga, hanap na'y bulate

isang kahig at isang tuka ang diskarte

pag walang matuka, babaling sa sayote 

na sa aming looban ay sadyang kayrami 

ganyan ang pamumuhay ng alagang tandang 

ngunit di upang isabak lang sa sabungan

kundi mga inahin ay buhayin naman

upang mangitlog, may bagong aalagaan

- gregoriovbituinjr.

08.26.2024

* mapapanood ang ilang segundong bidyo sa kawing na: https://fb.watch/uedWShIfQd/ 

Pagtuka ng bigas

PAGTUKA NG BIGAS

umaga, mga manok na'y patutukain

bibigyan sila ng bigas na mumurahin

habang malaya silang lupa'y galugarin

may alagang tandang at may ilang inahin

binidyo ko ang payak nilang pamumuhay

upang itula iyon habang nagninilay

ang buhay nila kung ilalarawang tunay

sangkahig, santuka, kahit mga inakay

tingni, animo sila'y abalang abala

sa paligid ay pagala-gala lang sila 

kakahig, tutuka, aba sila'y buhay na

di alam na panghanda sila sa piyesta

ganyan ang buhay ng mga alagang manok

isang kahig, isang tuka'y aking naarok

datapwat malaya naman sila sa bundok

na madalas ay itlog ang iniaalok

- gregoriovbituinjr.

08.26.2024

* mapapanood ang bidyo sa kawing na: https://fb.watch/ucRFVHCQNZ/ 

Pattong

PATTONG

nakiisa ako sa pagtugtog ng gangsa 

o Pattong nang may pagdiriwang sa kanila

na kaysarap sa kalooban ko talaga

na ako'y kanilang kaisa at kasama

kamag-anakan ni misis sa Cordillera 

na nagpapatuloy ng nagisnang kultura

lalo't aking napangasawa'y Igorota

na kalinangan ay pinaliwanag niya

sa pagtangan ng gangsa ay nababaguhan

dahil laking Maynila, tagakapatagan

subalit madali rin namang matutunan

at sumabay rin sa mga nagsisayawan

puso'y nagalak, kalooban ko'y sinalat

mula nang ikasal ay nabatid kong sukat

at kay misis sa pagbidyo niya'y salamat

nababalikan ko kung ginawa ko'y sapat

- gregoriovbituinjr.

08.25.2024

* mapapanood ang maikling bidyo sa kawing na: https://fb.watch/ueTTGZdC6E/ 

Kaylakas ng ulan sa bundok

KAYLAKAS NG ULAN SA BUNDOK

kaylakas ng ulan sa kabundukan 

ang mga bubong ay nagkalampagan

tubig sa dalisdis ay nagdaluyan

pusa't manok ay nagsipagtaguan

mabilis na niligpit ang sinampay

di na lumabas, doon lang sa bahay

ihip ng hangin ay napakaingay

na sa pisngi't balat ko'y lumalatay

ginawa na muna'y magmuni-muni

habang may ulan ay di mapakali

taludtod at saknong ang hinahabi

sa panulat man lang makapagsilbi

sana biyahe bukas ay maaraw

mula sa Benguet pauwi ng Cubao

ayos lang kahit biyahe'y maginaw

at si haring araw sana'y lumitaw

- gregoriovbituinjr.

08.25.2024

* mapapanood ang bidyo sa kawing na: https://fb.watch/ueud3ZCtjh/ 

Sa kabundukan

SA KABUNDUKAN

muling dumatal sa kabundukan 

ang tagapatag na mamamayan

lumayo muna sa kalunsuran

kamag-anakan ay pinasyalan

ulap ay nasa rabaw ng bundok

na di ko pa naabot ang tuktok 

ngunit ingat lang sa mga lamok

baka dengue pa ang makatusok

animo'y piging ang naririnig

nagsasaya ang mga kuliglig

awitan nila'y nakakaantig

huni ba nila'y iyo ring dinig

munti man ang bidyo kong hinabi

kaysa wala, ito na'y mabuti

at dito'y muling nagmuni-muni

palagay ay sa tula sinabi

- gregoriovbituinjr.

08.24.2024

* mapapanood ang munting bidyo sa kawing na: https://fb.watch/uetS4p1vtl/ 

Pagtilaok ng tandang

PAGTILAOK NG TANDANG

pagtilaok ng alagang tandang

ay saglit ko namang binidyuhan

pakinggan mo ang tinig sa ilang

animo'y musika sa tahanan

isang matikas na mandirigma

na tinuka'y aking sinariwa

talbos, palay, natira sa isda

bituka't hasang ay tinutuka

bawat pagtilaok niya'y batid

na kasiyahan sa puso'y hatid

hayaang alpas, lumigid-ligid

doon sa labas, sa gilid-gilid

minsan, patuka'y di na bibilhin

bagamat alaga siyang turing

talbos at mumo nga'y kinakain

sa ganyan, nakakatipid na rin

- gregoriovbituinjr.

08.24.2024

* mapapanood ang pitong segundong bidyo sa kawing na: https://fb.watch/ueh2YSpZcg/ 

Angep

ANGEP

kung kayganda ng araw kahapon

nang dumatal na ang dapithapon

kaytindi ng fog o angep ngayon

tila kabundukan nga'y nilamon

dama na ng katawan ko'y lamig

dapat nang magdyaket, nanginginig

animo ako'y nagpapalupig

sa ginaw, hamog at halumigmig

di ko na matanaw ang kaharap

na bundok sa kabila ng ulap

pagkat angep na ang yumayakap

sa nayon ng maraming pangarap

papasok muna ako ng bahay

umaambon na't di na palagay

at sa munting dampa'y magninilay

nang may tula muling maialay

- gregoriovbituinjr.

08.23.2024

* angep - salitang Ilokano sa fog

* mapapanood ang ilang segundong bidyo sa kawing na: https://fb.watch/uddMkNQbs7/ 

Sa paligid ng kabahayan

SA PALIGID NG KABAHAYAN

napakatahimik ng paligid

habang nagblakawt dito sa Benguet

dama ko ang amihang may hatid

na ginaw na sa pisngi'y humaplit

tinitigan ko ang mga tanim

na kay-aliwalas sa paningin

may paruparong bughaw at itim

na sa bulaklak ay naglalambing

muling sumikat ang haring araw

na di nalalambungan ng ulap

ang kariktan ng bundok ay tanaw

at tila sining ang alapaap

kayrami ng magugulay dito

sa pagkain ay tiyak ganado

- gregoriovbituinjr.

08.23.2024

* mapapanood ang bidyo sa kawing na: https://fb.watch/ud2JbY4FfG/ 

Si Muning

SI MUNING

may Muning pala silang alaga

makulit at di nakakatuwa

sa lamesa'y sadyang nakaabang

pag nalingat, ulam na'y nadukwang

subalit mabuti nang may pusa

pagkat paligid ay maahas nga

dahil masukal ang kagubatan

pusa'y depensa mo sa tahanan

ahas ay lalabanan n'yang tiyak

upang pamilya'y di mapahamak

binidyo ko siyang kumakain

at siya'y sarap na sarap man din

hayaan lang siya sa paglamon

at siya'y pinanood lang doon

sa kawalan ay muling nagmuni

kaylakas din ng ulan kagabi

- gregoriovbituinjr.

08.23.2024

* mapapanood ang bidyo sa kawing na: https://fb.watch/ud0kBtC2pJ/ 

Dapithapon sa Alapang

DAPITHAPON SA ALAPANG

pagdating ng hapon, ako'y nag-abang

sa paglubog ng araw sa Alapang

ang birthday ni bayaw ay pinagdiwang

na ang handa'y pansit at pinikpikan

araw ay aking minasdang lumubog 

upang nilayin ang kanyang pag-inog

tila ba ang kanyang iniluluhog

ay kapayapaa't pag-asang handog

sasapit din ang ating dapithapon

o takipsilim sa dako pa roon

ngunit natupad ba ang ating misyon?

at napagbuti ba ang nilalayon?

dapithapon, nagbalik ang gunita

sa mga pagbaka't di pa nagawa

nawa'y kamtin ng bayan ang ginhawa

umaaraw din matapos ang sigwa

- gregoriovbituinjr.

08.22.2024

* kuha ng makatang gala sa Barangay Alapang, La Trinidad, Benguet

* mapapanood ang maikling bidyo sa kawing na: https://fb.watch/udc_gavyaA/ 

Mula Alabang hanggang Alapang

MULA ALABANG HANGGANG ALAPANG

halos limang oras ang biyaheng kaybilis

tanaw na namin ang kanayunan at bundok

kaysarap bumalik sa bahay nina misis

kaylamig dito habang aking naaarok:

noong manggagawa pa ako sa pabrika

ay nag-opereyt ng makina sa Alabang

makalipas ang higit dalawang dekada

ang naging pamilya'y may bahay sa Alapang

sa una'y nagtrabaho akong manggagawa

sa pangalwa'y tahanang malayo sa lungsod

ang una'y nananatili na lang gunita

ang ikalawa'y kasalukuyan kong lugod

"Mula Alabang hanggang Alapang" sa isip

ko'y pamagat ng libro ng tula't sanaysay

subalit ito sa ngayon pa'y panaginip

kaya dapat lang aking pagsikapang tunay

- gregoriovbituinjr.

08.22.2024

* mapapanood ang bidyo sa kawing na: https://fb.watch/u6JJI5vXfc/ 

Mga bigating pugante'y di pa mahuli

MGA BIGATING PUGANTE'Y DI PA MAHULI

nagigisa ang PNP at DILG

sapagkat ang dalawang bigating pugante

hanggang ngayon ay di pa nila nahuhuli

anong nangyari? bakit di pa masakote?

para bang awtoridad pa ang kinakapos

subalit ayon kina Marbil at Abalos

lahat ng makakaya'y ginagawang lubos

nang gawain ng mga suspek na'y matapos

sina Guo at Quiboloy ang tinutukoy

na dapat nilang masakote sa kumunoy

ang isa'y Mayora, isa'y Pastor, kaluoy!

baka nakaalis na ng bansa, aba, hoy!

hoy, gising! ang sinisigaw ng mamamayan

ipakita nilang sila'y may kakayahan

dakpin na agad ang mga suspek na iyan

at maikulong sa kanilang kasalanan

- gregoriovbituinjr.

08.21.2024

* ulat mula sa pahayagang Abante, Agosto 16, 2024, p. 1 at 2

Sa BookSale

SA BOOKSALE

napadaan muli sa paboritong BookSale

at muling naghanap ng magandang pamagat

habang suot ang tshirt na may tatak BookSale

may mga bago kayang mumurahing aklat?

imbes magyosi, barkada, sugal o alak

bilihan ng aklat ang napiling tambayan

imbes sa bisyo, libro ang laman ng utak

hanap ko'y paksang sipnayan at panitikan

may mumurahing libro sa matematika

game theory, calculus, algebra, geometry

may mumurahing aklat sa literatura

fiction, kwento, nobela, tula o poetry

mayroon ding martial arts na libro't magasin

jeet kune do, aikido, judo, yawyan, karate

mayroon ding hinggil sa mga lulutuin

adobo, sinigang, iba't ibang resipe

napakaraming paksa ang mababasa mo

sa BookSale na aklatan ng dukha't dakila

maraming salamat, BookSale, sa mga libro

kaya ikaw ay amin ding kinakalinga

- gregoriovbituinjr.

08.20.2024

* mapapanood ang bidyo sa kawing na: https://fb.watch/u4rQxm2fH6/ 

Maligayang ika-85 kaarawan, FPJ

MALIGAYANG IKA-85 KAARAWAN, FPJ

bata pa lang ako'y pinanood na kita

sa sinehan, lalo ang pelikulang Panday

na sadyang kinagiliwan naming talaga

O, mabuhay ka, Flavio, bayani kang tunay 

aba'y nakasama mo pa si Julie Vega

doon sa pelikulang Isang Bala Ka Lang

pati Batang Quiapo, Eseng ng Tondo pa

Pepeng Kaliwete, at Batas ng Lansangan

kasama sa Pakner si Efren Bata Reyes

pinanood ang kayrami mong pelikula

sa sine'y pinakitang sa baril kaybilis

Ang Probinsyano, Ang Dalubhasa, Aguila

ikaw ay binabating tunay ni GBJ

dahil artista kang sadyang kahanga-hanga

maligayang kaarawan sa'yo, FPJ

tunay kang national artist ng ating bansa

- gregoriovbituinjr.

08.20.2024

* litrato mula sa isang fb page

Lagpas apat na taon sa kulungan

LAGPAS APAT NA TAON SA KULUNGAN

tatlong taon lang dapat sa kulungan sa Cavite

ang isang P.D.L. o person deprived of liberty

ngunit naging pitong taon, aba'y anong nangyari?

ating masasabi'y sadyang nagpabaya ang Korte!

ganyang pangyayari'y talagang nakakabagabag

mabuti't nabatid iyon ng isang Raymund Narag

nakausap niya ang preso't siya'y napapitlag

dapat lumaya na ang preso, ang kanyang pahayag

nabatid ni Narag ang ganitong pagmamalabis

sa training niya on jail management at ito'y lihis

mababasa iyon sa pesbuk post niyang "Just-Tiis"

siya'y expert sa international criminal justice

"Ay sori, di pala napadala ang dokumento"

ang sabi umano ng isang istaf ng husgado

matapos paralegal officers sanayin nito

umaasa siyang di mauulit ang ganito

- gregoriovbituinjr.

08.20.2024

* ang buong ulat ay matatagpuan sa kawing na: https://news.abs-cbn.com/regions/2024/8/12/cavite-court-blamed-for-inmate-overstaying-for-4-years-in-jail-1642 

Dalawa kong aklat ng tula ni National Artist Gemino H. Abad

DALAWA KONG AKLAT NG TULA NI NATIONAL ARTIST GEMINO H. ABAD

Maikling sanaysay at tula ni Gregorio V. Bituin Jr.

Dalawang beses ko lang siyang nakita nang personal - nang maging tagapagsalita siya sa asembliya ng Philippine PEN sa Cultural Center of the Philippines (CCP) noong Setyembre 20, 2022, at noong unang ganapin ang National Poetry Day, Nobyembre 22, 2022, sa Metropolitan Theatre (MET).

Gayunman, hindi ako nagkaroon ng pagkakataon na mag-selfie o magpalitrato nang kasama siya. Naging National Artist for Literature si Ginoong Gemino H. Abad noong Hunyo 10, 2022.

Nang mailunsad ang tatlong araw na 25th Philippine Academic Book Fair sa SM Megamall nitong Hunyo 2024, nabili ko sa ikatlong araw sa booth ng UP Press ang dalawang libro ng mga tula ni Ginoong Abad. Ang isa ay may pamagat na "Where No Words Break - New Poems and Past" na may kabuuang 190 pahina (14 ang Roman numeral, at 176 ang nasa Hindu-Arabic numeral), may sukat na 6" x 9".

Ang isa pang aklat, na mas makapal, ay pinamagatang "The Light in One's Blood - Select Poems, 1973-2020". Ito ay may sukat ding 6" x 9" at may kabuuang 368 pahina (20 ang Roman numeral, at 348 ang Hindu-Arabic numeral).

Dahil ang napuntahan ko'y Book Fair, mura ang karamihan ng mga aklat. P59 ang bawat aklat ni Ginoong Abad, kasama ng siyam pang P59 din ang presyo, tatlong tigtitrenta pesos, at dalawang tigisangdaang piso, kaya P939 lahat. Kasama sa nabili ko ang aklat ng isa pang national artist for literature, si Ginoong Cirilo F. Bautista - ang Tinik sa Dila.

Mga collectors' item nang maituturing ang dalawang aklat na ito ng ating national artist for literature na si Ginoong Abad, kaya ito'y inilagay ko na sa aking munting aklatan, at minsan ay binabasa-basa lalo na pag nagpapahinga sa gabi, bago matulog.

Tulad ng ginagawa ni national artist for literature Virgilio S. Almario, may petsa rin ang ilang tula ni Ginoong Abad, lalo na sa "Where No Words Break" kaya maiisip natin na sa gayong edad niya ay iyon na ang isinusulat na paksa. Dahil sa petsa ay nauunawaan natin paano nga ba umunlad ang panulat ng makata mula noon hanggang ngayon. Habang pawang mga talababa o footnote naman sa aklat na "The Light in One's Blood".

Ang mga tula niya sa aklat na "Where No Words Break" ay hinati sa tatlong tema: 

(1) Mind, Language, Poetry, na may 23 tula;

(2) Self, Love, Family, na may 22 tula; at

(3) People, God, Country, na may 24 tula, o kabuuang 69 na tula.

Hinati naman sa apat na kabanata ang kanyang aklat na "The Light in One's Blood":

(1) Mind, Imagination

a. Mind - may 15 tula;

b. Imagination - may 11 tula.

(2) Language, Poetry

a. Language - may pitong tula;

b. Words - ay pitong tula;

c. Reading - may apat na tula;

d. Writing - may walong tula;

e. Poetry - may limang tula.

(3) Self, Love, Family

a. Moods, Stances - may sampung tula;

b. self and Love - may siyam na tula;

c. Seld, Family - may labing-isang tula.

(4) Country, People, Martial Law

a. Country - may siyam na tula;

b. People - may siyam na tula;

c. Martial Law - may labing-isang tula;

d. God - may labintatlong tula; at

e. Death - may anim na tula.

Sa kabuuan ay may 135 na tula.

Sa huling bahagi ng aklat ay ang kanyang mahabang sanaysay na pinamagatang "Mind, Language, and the Literary Work: A Poetic" na may labing-anim na pahina. Kumbaga ito ang kanyang bersyon bilang makata kumpara sa "Poetics" ni Aristotle at "The Poetic Principle" ni Edgar Allan Poe.

Sinubukan kong kumatha ng tula hinggil kay Ginoong Abad.

DALAWA KONG AKLAT NG TULA NI NATIONAL ARTIST GEMINO H. ABAD

"Where No Words Break", na wala raw salitang mababasag

matalinghagang libro iyong di ka makapitlag

tema'y pinag-iisip ka habang nababagabag

nagpapaliwanag, may liwanag, at maliwanag

"The Light in One's Blood", pag naisip mong doon dumako

iyong matatantong may liwanag sa kanyang dugo

animo kanyang mga paksa'y makadurog-puso

na sa kabila ng liwanag ay may maglalaho

mabuti't mura ko iyong nabili sa UP Press

gayong kaymahal pagkat sa laman ay labis-labis

parang balong malalim, di maarok, tumatangis

habang mga agiw sa aking diwa'y pinapalis

kung si Edgar Allan Poe ay may akdang "The Poetic

Principle", at si Aristotle nama'y may "Poetic"

si Gemino H. Abad ay may akda ring natitik:

ang "Mind, Language, and the Literary Work: A Poetic"

sa kanyang mga libro, ako'y nagpapasalamat

ang kanyang mga katha'y sadyang nakapagmumulat

anong gandang basahin niyon pag iyong nabuklat

masasabi mong ang makata'y talagang alamat

08.20.2024

Ang barko sa Fiesta Carnival

ANG BARKO SA FIESTA CARNIVAL

para bagang babagsak ang barko

at dadaganan ang aking ulo

kung mapigtal ba iyon, paano

tiyak ang barko'y masasalo ko

ngunit Spartan ay di natinag

ipinakitang siya'y matatag

ang barko'y di naman bumalibag

nagpatuloy lang sa paglalayag

ang galaw ng barko'y binidyuhan

sabay sa alon ng karagatan

habang doon nakaupo lamang

sa nakitang pagpapahingahan

ang barko'y palaruan ng bata

sa karnibal na puno ng sigla

batang naroong nakatutuwa

na dapat may kasamang matanda

- gregoriovbituinjr.

08.19.2024

* mapapanood ang bidyo sa kawing na: https://fb.watch/u30J-czEHQ/ 

Batang edad 2, patay sa kalderong may kumukulong sabaw

BATANG EDAD 2, PATAY SA KALDERONG MAY KUMUKULONG SABAW

sadyang nakaluluha ang mapait na naganap

sa isang batang dalawang taon pa lang ang edad

di inakala ng inang mamamatay ang anak

sa kalderong may kumukulong sabaw mapahamak

nasabing ina'y abala noon sa pagluluto

sa malaking kaldero ng batsoy na kumukulo

katabi lamang niya ang anak na naglalaro

hanggang kanyang nilapag sa lupa ang niluluto

nilapag dahil sa ibang lulutuin tumutok

di namalayang anak ay aksidenteng napasok

sa kalderong may kumukulong sabaw, at nalapnos

ang buong katawan ng bata, ah, kalunos-lunos

naitakbo pa sa ospital ang nasabing bata

na halos buong katawan ay nag-fourth degree burn nga

lumipas ang ilang araw, pumanaw na't nawala

ang nasabing bata, ngayon, ang ina'y nagluluksa

- gregoriovbituinjr.

08.19.2024

* ulat mula sa pahayagang Bulgar, Agosto 16, 2024, p.2

Arestado?

ARESTADO?

kung si Pastor Quiboloy, alam ni Duterte

kung saan nagtatago, ano ang mensahe?

di mahuli-huli ng pulis, D.I.L.G.

at siya pa'y aarestuhin ng I.C.C.

ayon kay J. Antonio Carpio, retired Justice

may ilalabas umanong warrant of arrest

kay Duterte, na nag-atas sa mga pulis

na ang mga suspek sa drug war ay matugis

ang mga salitang extra-judicial killing

na pumalit sa 'salvage', maging ang tokhang din

ay naging palasak na salita sa atin

batid ng bayan kung sinong dapat usigin

mga samahan sa karapatang pantao

ay tiyak inabangan ang balitang ito

dahil mga pagpaslang ng walang proseso

ay kawalang hustisya't isang pag-abuso

kayraming ina pa ring ngayo'y lumuluha

dahil mahal nila sa buhay ay nawala

ang E.J.K. at tokhang nga'y kasumpa-sumpa

hiling nilang hustisya'y makamtan nang sadya

- gregoriovbituinjr.

08.19.2024

* ulat mula sa pahayagang Bulgar, Agosto 16, 2024, p. 1 at 2

Tatlong Pocketbook at Dalawang Biograpiya

TATLONG POCKETBOOK AT DALAWANG BIOGRAPIYA

bumili akong pocketbooks na mumurahin

upang mga nobelang narito'y basahin

sampung piso nga ang isa, napakamura

na nadaanan ko lang sa isang bangketa

akala mo lang bagito ang manunulat

dahil mura lang ang mga librong nagkalat

subalit kayhusay pala ng mga ito

mag-iisip ka sa banghay at pagkakwento

estilo ng nobelista'y nais maaral

sa mga librong sa akin ay nagtatagal

nabili ko sa BookSale ang biograpiya

nina Muhammad Ali at Barack Obama

kaya pala BookSale, mura ang magagastos

isang libro'y nabili kong kwarenta pesos

dagdag sa munti kong aklatan ang nabili

lalo't sa pagbabasa, ako'y nawiwili

- gregoriovbituinjr.

08.19.2024

4' 11" lang si Caloy Yulo

4' 11" LANG SI CALOY YULO

pitong dali pala ang tangkad ko sa kanya

singliit lang siya ng artistang si Nora

o marahil ay ng dating pangulong Gloria

ngunit siya'y "Ismol Bat Teribol" talaga

ang tulad niyang maliit ay sumisikat

tulad ni Nora na sa pag-arte sumikat

tulad ni Gloria na naging pangulong sukat

sa galing at di sa liit sila nasukat

alam niyang di siya pwede sa basketball

kaya sa gymnastics panahon ay ginugol

ayon sa kasabihan: "kung ukol, bubukol"

nakuha'y dalawang gold, "Ismol Bat Teribol"

Carlos Yulo, sadyang isa ka nang alamat

ngalan mo sa kasaysayan na'y nasusulat

sa tagumpay mo, buong mundo ang ginulat

kaya ang buong bansa'y nagpapasalamat

- gregoriovbituinjr.

08.18.2024

* ulat mula sa pahayagang Remate, Agosto 15, 2024, p.5

Salamat sa pagkilala

SALAMAT SA PAGKILALA

dapat kong pasalamatan

ang anumang pagkilala

tulad na lang ng lingguhang

engagement sa pesbuk pala

ah, mayroon palang ganyan

nasusubaybayan ako

sa aking nakaugnayan

sa sanlinggo ng Agosto

pawang sila'y nabubuklat 

o hinggil sa mga libro

na hilig ng manunulat

at abang makatang ito

Liwayway, Anvil Publishing,

limbagan ng Ateneo,

BiblioCave, Mt. Cloud Bookshop,

Savage Mind: Arts, Books, Cinema

kaya ako'y nawiwili

pesbuk page nila'y abangan

kung marapat ay bibili

ng aklat kung kailangan

muli, maraming salamat

sa ganitong pagkilala

maraming nadadalumat

at nagbibigay-pag-asa

- gregoriovbituinjr.

08.18.2024

Malayang taludturan

MALAYANG TALUDTURAN

"where brains matter more than looks"

tatak sa tshirt na nabili ko sa BookSale

"Where No Words Break"

na nabili ko sa UP Press

pamagat ng aklat ng national artist

na si Gemino H. Abad

katabi ng "Selected Poems and New"

ni national artist Jose Garcia Villa

dalawang Pinoy na makata sa Ingles

nais kong mabasa ang kanilang obra

kaunti lang ang tula kong nasulat

sa wikang Ingles na pinagbutihang sukat

sa wikang banyaga'y di pa makapagmulat

kaya sa wikang sarili nagpapakabihasa

buhay kong maikli'y napapahaba

dahil sa pagkatha ng talim ng diwa

habang nakatapak pa sa lupa

habang nakayapak pa sa luha

habang nakatatak pa sa luma

habang nakayakap pa sa lula

habang napalatak pa sa luga

habang napakapayak ng tula

- gregoriovbituinjr.

08.18.2024

Mag-inang natutulog sa bangketa

MAG-INANG NATUTULOG SA BANGKETA

natutulog sa bangketa silang mag-ina

na habang lulan ng dyip ay aking nakita

kalsada na ba ang tahanan ng pamilya

dahil ba sa hirap ay doon na tumira?

pasimple ko silang kinunan ng litrato

sa kanila'y walang magawa ang gobyerno?

kundi bigyan ng limos o ayuda ito?

imbes na paalwanin ang buhay ng tao?

bakit walang magawa ang pamahalaan?

sa mga naghihirap nating mamamayan?

silang mga matakaw sa kapangyarihan

na nais lang gawin yata'y katiwalian!

dahil utak negosyante ang namumuno

na nais lang mangyari'y paano tumubo

serbisyo'y ninegosyo ng trapong hunyango

gayong "pinuno" silang di dapat maupo

pag daw maraming pulubi sa isang bansa

ang gobyerno raw nila'y walang ginagawa

gobyernong walang paki sa buhay ng dukha

ay dapat sama-samang ibagsak ng madla

- gregoriovbituinjr.

08.18.2024

* litratong kuha ng makatang gala sa Roces Avenue sa Lungsod Quezon, Agosto 16, 2024

Mag-isang nagdiriwang

MAG-ISANG NAGDIRIWANG

kalmado lang akong umiinom

ng Red Horse dito sa munting silid

pangatlong dekada'y nilalagom

katapatan ko'y di nalilingid

tatlong dekada na sa lansangan

tatlumpung taon na ng pag-iral

na yaring puso't diwa'y nahinang

sa pagbaka kahit napapagal

ah, sino kayang mag-aakala

sa dami ng dinaanang sigwa

sa rali'y ilang beses nadapa

narito pa ring lapat sa lupa

patalim man, balaraw o baril

sa pagbaka'y walang makapigil

hangga't prinsipyo'y nakaukilkil

tibak na makata'y walang tigil

- gregoriovbituinjr.

08.17.2024

Wala nang boksing sa Los Angeles Olympics 2028

WALA NANG BOKSING SA LOS ANGELES OLYMPICS 2028

tagahanga raw ng Olympics umano'y nainis

dahil mayroon daw kilalang isports ang inalis

International Olympics Committee ang nagturing

sa sunod na Olympics na'y walang isports na boxing

inalis ng IOC ang ganap na pagkilala 

sa International Boxing Association (IBA)

na global governing body noong nagdaang taon

matapos ang maraming isyu'y iyon ang desisyon

wala munang boxing sa Quadrennial Sportsfest

sa susunod na Olympics doon sa Los Angeles

sana'y maibalik ang boxing dahil may panlaban

ang mga Pilipinong may kamaong katigasan

bagamat wala pa tayong gold medalist sa boxing

may gold medalists naman sa gymnastics at weightlifting

kaya mga isports na iyan ang ating tutukan

sa Los Angeles Olympics ay may mga panlaban

- gregoriovbituinjr.

08.17.2024

* ulat mula sa pahayagang Remate at Abante Sports, Agosto 15, 2024

Tokasi

TOKASI

muli, TOKASI - may TOyong KAmatis at SIbuyas

ang aking agahan upang katawan ay lumakas

habang pinanonood ko ang Alas Pilipinas

sina Jia, Sisi, Fifi, kung pumalo'y matikas

madaling araw natulog, at tirik na ang araw

nang magising, habang dinig ang mga pambubulyaw

ng kapitbahay, ang isa'y may asong binubugaw

habang may isa namang sa malayo nakatanaw

pagkakain ay baka pumunta munang palengke

o magtanggal muna ng mga agiw sa kisame

o labhan muna ang naipong labadang kaydami

habang mainit pa ang araw, ito ang diskarte

TOKASI ang agahan dahil iyan ang nariyan

pampakinis ng kutis, pampalakas ng katawan

paghahanda sa maraming trabaho sa tahanan

lalo na't Sabado, walang pasok sa pagawaan

parang "Ito kasi" tila paninisi sa akin

habang nilagang luya o salabat ang inumin

buting may laman ang tiyan sa dami ng gawain

pagkalaba saka na mag-isip ng uulamin

- gregoriovbituinjr.

08.17.2024

Agosto 17, 1994

AGOSTO 17, 1994

iyan ang petsa noong ako'y tanggapin nang ganap

at sumumpang sa masa't uri'y maglingkod ng tapat

ilang taon na akong tibak bago pa matanggap

petsang iyan ang birthday ko sa prinsipyong akibat

ngayong araw ay ikatlong dekada nang Spartan

pagbati sa sarili'y "Maligayang Kaarawan!"

patuloy lang sa tungkuling niyakap kong lubusan

tangan ang prinsipyo maging kapalit ay buhay man

patuloy sa pakikibaka, tuloy ang pagkatha

bilang Spartan, bilang atleta, bilang makata

bawat tula'y tulay ko sa paglilingkod sa dukha,

babae, vendor, bata, magsasaka, manggagawa

ah, tatlong dekada na nga ako sa araw na 'to

madalas, ipinagdiriwang ko ito ng solo

ngayon, isang tagay para sa iyo, katoto ko

sa samboteng serbesa'y magtig-isang baso tayo

- gregoriovbituinjr.

08.17.2024

Payo ni Caloy

PAYO NI CALOY

magtiwala ka lang sa sarili

di man maniwala ang marami

gawin ang nararapat pa'y sabi

at tiyak na di ka magsisisi

iyan ang payo ni Carlos Yulo

sa nais mag-atletang totoo

susi sa tagumpay niyang ito

kaya Pilipino'y inspirado

magtiwala ka lang sa sarili

sa atin ay magandang mensahe

maniwala ka lang sa sarili

di ka luluha ng balde-balde

Carlos Yulo, ang pangalang iyan

ay naukit na sa kasaysayan

ng isports sa bunyi nating bayan

di ka mabibigo magsikap lang

Caloy Yulo, mabuhay! Mabuhay!

salamat ang tanging iaalay

taasnoo kaming nagpupugay

sa mga nakamit mong tagumpay

- gregoriovbituinjr.

08.17.2024

* ulat mula sa pahayagang Abante Tonite, Agosto 15, 2024, p.8

Si Bulaklak at si Bubuyog

SI BULAKLAK AT SI BUBUYOG

nang manligaw / kay Bulaklak / si Bubuyog

agad niyang / sinambit ay / "Aking irog!

Tanggapin mo / nawa yaring / niluluhog"

(parang manggang / manibalang, / di pa hinog)

"Aking hiling / ay sagutin / ako agad

at ikasal / agad tayo / yaring hangad!"

(sa lambanog / ay may pasas / akong babad

kung sa kasoy / ay prinsesang / nakalantad!)

ang Kampupot / ay nag-isip / namang saglit

"Narinig ko / anong iyong / sinasambit

ay, datapwat / ayoko nang / pinipilit

huwag munang / umasa kang / mapalapit"

"Ako nama'y / handa ngunit / di susuko

pagkat ikaw / lamang yaring / sinusuyo

sakali mang / ako'y sa'yo'y / mabibigo

ay talagang / nawarat na / yaring puso!"

- gregoriovbituinjr.

08.17.2024

* litrato mula sa google    

Dalawang nawawalang tibak

DALAWANG NAWAWALANG TIBAK

dalawa na namang / aktibista yaong / umano'y dinukot

ng mga tauhan / ng isang ahensyang / baka nga kasangkot

ang ganitong gawang / kriminal ay sadyang / nakakahilakbot

dalawang tibak na'y / desaparesido... / ah, nakatatakot!

sina Gene de Jesus / at Dexter Capuyan / ang dalawang tibak

nagpasaklolo na / sa Korte Suprema / ang mga kaanak

hiling ng pamilya / ay maligtas sila't / di na mapahamak

ang writ of amparo / at habeas data'y / hiling na tiniyak

ang writ of amparo / ay isang remedyo / para sa nalabag

nilang karapatan, / buhay, kalayaan, / maging seguridad

ng sinumang tao, / taga-gobyero man, / simpleng indibidwal

konstitusyonal na / karapatan naman / ang habeas data

upang magkaroon / ng akses sa impo / hinggil sa kanila

kung nasaan sila? / saan ikinulong? / mailabas sila

kinaroroonang / selda, tagong silid / ay di dapat malingid

sa pamilya nilang / ang hirap ng loob / ay di napapatid

tinortyur ba sila? / patay na ba sila? / ay dapat mabatid

palayain sila! / ito ang magandang / mensaheng ihatid

- gregoriovbituinjr.

08.16.2024

* ulat mula sa pahayagang Remate, Agosto 15, 2024, p.8

Nakasusugat din ang salita

NAKASUSUGAT DIN ANG SALITA

higit pa sa bala o punyal ang salita

sapagkat kayang sumugat ng puso't diwa

nakahihiwa ang masakit na kataga

kaya pag-ingatan ang lalabas sa dila

subukan mong magtungayaw sa isang tao

nang walang dahilan, ikaw ay siraulo

subalit ngumiti ka't sila'y purihin mo

ng taos, at sila'y matutuwa sa iyo

"ang salita'y panunumpa" anang Kartilya

ng Katipunan kaya huwag bara-bara

pag namutawi sa labi mo'y magaganda

sinumang makarinig ay tiyak sasaya

kung pagdurugo ng sugat ay di maampat

sa kalaunan ay balantukan ang pilat

masakit pa rin kahit naghilom ang balat

kaya bawat bitaw ng salita'y mag-ingat

- gregoriovbituinjr.

08.16.2024

* litratong kuha ng makatang gala sa Daang Onyx sa San Andres Bukid, Maynila, Agosto 16, 2024

Noong isang araw

NOONG ISANG ARAW

nagdeyt na naman ang magsing-irog

bago pa ang araw ay lumubog

nagsama'y Bulaklak at Bubuyog

kumain muna't nagpakabusog

inulam sa karinderya'y sisig

panghimagas naman ay pinipig

ganyan sina Maganda't Makisig

na parang asukal pag umibig

maraming salamat, aking sinta

sa puto, kutsinta at bibingka

sa biko, suman at ensaymada

sa pagpupulotgata tuwina

sa isang salaminan nag-selfie

sa deyt ng Ginoo't Binibini

noong isang araw lang nangyari

habang sa ibang araw ay busy

- gregoriovbituinjr.

08.16.2024

Pahinga muna sa Fiesta Carnival

PAHINGA MUNA SA FIESTA CARNIVAL

matapos magbenta ng Taliba ng Maralita

sa mga erya't organisasyon ng mga dukha

bumiyahe pauwing Cubao ang abang makata

sa Fiesta Carnival nagpahingang nanlalata

noong kabataan ko'y hilig kong tumambay doon

ngunit nawala iyon higit dalawampung taon

naiba na, naging pamilihan, Shopwise paglaon

nagbalik ang Fiesta Carnival, iba na ngayon

uminom muna ako ng kinse pesos na palamig

umupo sa bangko, malakas ang erkon, malamig

ngunit katamtaman lang, di naman ako nanginig

pahinga, nagnilay, habang sa musika'y nakinig

pinanood ang mga bata't inang nakasakay

sa barkong naglalayag habang ako'y nagninilay

may kalahating oras din ako roon tumambay

magsasaing pa, at ako'y umuwi na ng bahay

- gregoriovbituinjr.

08.15.2024

* mapapanood ang 15 segundong bidyo sa kawing na: https://fb.watch/tZFb3sCKn6/ 

Sigaw ng Taumbayan: Sweldo ng Mambabatas, Bawasan!

SIGAW NG TAUMBAYAN: 

SWELDO NG MAMBABATAS, BAWASAN!

sa isang artikulong showbiz sa Bulgar na pahayagan

ay nakapukaw agad ng pansin ang pamagat pa lamang:

"Sigaw ng Madlang Pipol: Sweldo ng Mambabatas, Bawasan!"

showbiz ngunit pulitikal ang laman, aba'y kainaman

artista kasi ang asawa ng pinuno ng Senado

kaya nga pinupusuan na rin ng showbiz si Heart mismo

local holidays ay nais bawasan ni Chiz Escudero

kayrami raw holidays sa bansa, dapat bawasan ito

sagot ng madla: Ang bawasan n'yo'y sweldo ng mambabatas!

ang mababawas ay ilagay sa bawat kilo ng bigas

baka mapababa rin ang presyong pataas ng pataas

bumaba ang presyo ng kamatis, galunggong at sardinas 

iparehas ang sweldo ng mambabatas sa manggagawa

minimum wage plus seven hundred fifty pesos, ipasa nga!

mambabatas sana'y pakinggan ang panawagan ng madla

at ipakita nilang sila'y tunay na kumakalinga

- gregoriovbituinjr.

08.15.2024

* ulat mula sa pahayagang Bulgar, Agosto 14, 2024, p.7

Huwag mong basahin ang aking tula, kung...

HUWAG MONG BASAHIN ANG AKING TULA, KUNG...

huwag mong basahin ang aking tula

kung ikaw ay palamara't kuhila

kung pulitikong walang ginagawa

kundi magnakaw sa kaban ng bansa

ang aking tula'y huwag mong basahin

kung ikaw ay kapitalistang sakim

kung may krimen kang karima-rimarim

kung trapo kang may budhing anong itim

huwag mong babasahin ang tula ko

kung nagsasamantala sa obrero

kung mahihirap ay inaapi mo

kung serbisyo'y iyong ninenegosyo

dahil tiyak na uupakan kita

sa aking tula't baka masaktan ka

pag-uusig ko'y baka di mo kaya

at baka ako'y gagantihan mo na

ngunit ang tulad kong mananaludtod

sa kagaya mo'y di maninikluhod

hustisya'y lagi kong tinataguyod

kahit galamay mo pa'y magsisugod

- gregoriovbituinjr.

08.15.2024

Bianca Pagdanganan, 4th Placer sa Golf sa Paris Olympics

BIANCA PAGDANGANAN, 4TH PLACER SA GOLF SA PARIS OLYMPICS

isa ka sa mga atletang aking inabangan

kung gintong medalya sa golf ay iyong makakamtan

sa ikaapat mong pwesto'y tagumpay ka rin naman

kaya ikaw ay marapat lang naming saluduhan

nakasama sa paglalakbay si Dottie Ardina

na golf din ang larangan at magaling ding atleta

panglabintatlong pwesto man yaong kanyang nakuha

ay dapat pa ring kilalanin ang tagumpay niya

nawa sa susunod ay makuha ninyo ang ginto

o medalyang pilak o kahit na medalyang tanso

sa larangang golf, naabot ninyo'y napakalayo

makakamit din ang tagumpay, huwag lang susuko

nagpapasalamat kami sa inyong matagumpay

na pagrepresenta sa bansa, kami'y nagpupugay

sa larangan n'yo'y magpatuloy lang kayong magsikhay

sa ating mga golfer, mabuhay kayo! MABUHAY!

- gregoriovbituinjr.

08.14.2024

* ulat ng Agosto 12, 2024 ,mula sa mga pahayagang Pilipino Star Ngayon (p.12), Bulgar (p.12), Abante (p.12), at Pang-Masa (p.8)

Yes sa wage increase!

YES SA WAGE INCREASE!

sa tanong nilang "Pabor ka ba sa wage increase?"

OO ang sagot ng obrerong mapagtiis

HINDI sa kapitalistang mapagmalabis

at HINDI rin sa negosyanteng mapantikis

anong klaseng tanong iyan? nakamumuhi!

pinakita lang nilang wala silang budhi

sa kayod-kalabaw na manggagawa kundi

ang mga tusong negosyante'y ipagwagi

kung obrero ka't nag-HINDI, aba'y gago ka!

tataasan ka na ng sahod, ayaw mo pa?!

kung kapitalista kang nag-OO, santo ka

lalamunin ka ng ibang kapitalista

tanga lang ang aayaw sa umentong iyon

kung obrero kang sa hirap at utang baon

kaya bakit Wage Board iyan ay itinanong

sila nga ba'y makakapitalista't buhong?

kapitalista'y palamunin ng obrero

kaya may tubo dahil sa nagtatrabaho

tengga ang pabrika kung wala ang obrero

panahon nang taasan ang kanilang sweldo

- gregoriovbituinjr.

08.14.2024