Maso at Panitik: Pebrero 2019

Miyerkules, Pebrero 27, 2019

Ang halalang ito'y gawin nating makasaysayan

ANG HALALANG ITO'Y GAWIN NATING MAKASAYSAYAN

wala pa tayong Senador na manggagawa
na ilang taong nagtrabaho sa pabrika
elitista't artista ang bumubulaga
nananalo sapagkat masa'y nagpabola

kaya ang sigaw namin: Manggagawa Naman!
iboto ang manggagawang subok sa galing
ang aming kandidato: Leody de Guzman
lider-manggagawa, prinsipyado, magiting

ang mga trapong Senador ay walang nagawa
upang buhay ng masa'y guminhawang ganap
baka lider-obrero'y pag-asa ng madla
upang ipaglaban ang kanilang pangarap

gawing makasaysayan ang halalang ito
at maging bahagi tayo ng kasaysayan
lider-manggagawa'y ilagay sa Senado
kaya ating iboto: Leody De Guzman

- gregbituinjr.

Linggo, Pebrero 24, 2019

Si Clara Zetkin, sosyalistang lider-kababaihan

SI CLARA ZETKIN, SOSYALISTANG LIDER-KABABAIHAN

taas-kamao sa sosyalistang si Clara Zetkin
lider-kababaihan at kaibigan ni Lenin
at Rosa Luxemburg na pawang mga magigiting
na sa kanilang panahon ay bayaning tinuring

sa Stuggart, siya'y kasapi ng Bookbinders Union
naging aktibo rin sa Tailors and Seamstresses Union
at dati ring Kalihim ng Internasyunal noon
gayong ilegal sa babae noon ang mag-unyon

kumperensya ng mga babae'y inorganisa
pagboto ng babae'y ipinaglaban din niya
at nilabanan ang peminismong sumusuporta
sa restriksyon sa pagbotong batay sa ari't kita

mas nakatuon siya sa uri, at di sa sekso
na prinsipyo niya sa panlipunang pagbabago
naniniwala si Zetkin na tanging sosyalismo
ang daan upang lumaya ang babae't obrero

malaki ang inambag ni Zetkin sa kasaysayan
ng daigdig, lalo sa mapagpalayang kilusan
ng mga kababaihan tungo sa kalayaan
at nag-organisa ng Araw ng Kababaihan

kaya muli, isang taas-kamaong pagpupugay
kay Clara Zetkin na talagang sosyalistang tunay
sa manggagawa't sosyalismo, buhay ay inalay
kaya sa iyo, Clara Zetkin: Mabuhay! Mabuhay!

- gregbituinjr.

Miyerkules, Pebrero 20, 2019

Ang awiting Heal the World ni Michael Jackson

ANG AWITING "HEAL THE WORLD" NI MICHAEL JACKSON

halina't pakinggan ang Heal the World ni Michael Jackson
sapagkat awiting ito'y isang mensahe't hamon
tila ba sa plastik at usok, tao'y nagugumon
at mga isda sa dagat, upos ang nilululon

halina't awiting Heal the World ay ating suriin
ang mensahe'y sa kapwa tao inihahabilin
sakit nitong mundo'y tulong-tulong nating gamutin
paano ba kanser ng lipunan ay lulutasin

daigdig bang tahanan nati'y sakbibi na ng lumbay
pagkat pinababayaan natin itong maluray
ng usok ng kapitalismong naninirang tunay
sa ngalan ng tubo, kalikasa'y ginutay-gutay

huwag nating ipagwalangbahala't isantabi
kundi damhin natin ang awit, ang kanyang mensahe
ang habilin sa ating kumilos at maging saksi
upang henerasyon nati'y di magsisi sa huli

- gregbituinjr.

Biyernes, Pebrero 1, 2019

Bakit malupit mag-yosi break?

BAKIT MALUPIT MAG-YOSI BREAK?

yosi break na rin ang tawag ko sa munting pahinga
di naman nagyoyosi't tunganga lang sa kalsada
naroong nagninilay habang namamalikmata
na may naglalakad na isang magandang dalaga

kailangang mamahinga sandali't mag-yosi break
lalo't napakabanas at araw ay nakatirik
di man nagyoyosi, sa pamamahinga na'y sabik
pagkat panahon ng pagkatha, ilantad ang hibik

ang iba'y nagyoyosi't nasasarapang humitit
ramdam nila'y ginhawa habang upos nakadikit
sa labi, habang nagkukwento siya't nangungulit
sa kausap, at baka may kung anong hinihirit

anong lupit mag-yosi break, humihiram ng alwan
kahit man lang sumandali, ginhawa'y maramdaman

- gregbituinjr.

Mag-subscribe sa: Mga Post (Atom)

Ang MASO AT PANITIK ay isang samahan ng mga makata at manunulat para sa uring manggagawa at masa ng sambayanan. Ang tema ng kanilang mga sulatin ay hinggil sa pakikibaka ng proletaryado, at pagwasak sa relasyon ng pribadong pag-aari ng mga kagamitan sa produksyon dahil ito ang ugat ng kahirapan. Sa panitikan ngayon, laganap pa rin ang kaisipan ng burgesya, mayayaman, kapitalista, at mga elitista. Sa kabilang banda’y laganap din ang nagsusulong ng kaisipang makabayan at pambansang demokrasya. Di dapat sa ganito lamang mauwi ang panitikan.

Para sa grupong MASO AT PANITIK, internasyunalismo at sosyalismo ang dapat lumaganap ngayon. Kaya nagkaisa ang ilang mga sosyalistang makata at manunulat na dapat gamitin ang literatura para sa pagsusulong ng kaisipang sosyalismo sa uring manggagawa at masa ng sambayanan. Tungkulin ng mga kasapi ng MASO AT PANITIK ang pagmumulat sa madla tungo sa adhikaing pagbabago at pagkakapantay sa lipunan hanggang sa maitatag ang isang lipunang sosyalismo.

10 Katangian ng Sosyalismong Tinitindigan ng BMP

Isa mga pangunahing dahilan ng pagbaklas ng BMP sa KMU ang magkaibang tindig ng dalawang samahan sa oryentasyon ng kilusang paggawa - magkakasya na lamang ba ang mga manggagawa sa pagsusulong ng pambansang demokrasya o ipaglalaban nila ang isang lipunan na bubuwag sa lahat ng anyo ng pang-aapi at pagsasamantala?

Sa ilalim ng pambansang demokrasya, iinam ang kalagayan sa paggawa ng mga manggagawa. Subalit mananatili silang alipin ng kapital - mga sahurang alipin na binubuhay lamang para lumikha ng yaman na hindi sa kanila.

Sa sosyalismo na tinitindigan ng BMP, ipapalit ang isang sistema na walang pagsasamantala at pang-aapi sa sinuman. Isang sistema na magtataglay ng sumusunod na katangian:

1. Lipunang walang mga uri. Lipunan na hindi hinahati, hindi sinisino o kinikilala ang tao sang-ayon lamang sa uri niyang kinalalagyan.

2. Lipunang walang imperyalismo at imperyalistang pagsasamantala. Lipunang wawakas sa kapitalismo at kapitalistang pagsasamantala.

3. Lipunang walang pribadong pagmamay-ari ng mga kasangkapan sa produksyon. Lipunang nakapundar sa sosyal na pagmamay-ari ng mga kasangkapan at mga produktong nililikha nito.

4. Lipunang hindi pinatatakbo ng 'free market' o nakapundar lamang sa tubo at paghahangad ng limpak na tubo. Lipunang nakaplano ang ekonomiya sang-ayon sa layuning ipagkaloob ang lahat ng pangangailangan ng tao.

5. Lipunang ang estado ay pinatatakbo ng mga manggagawa. Lipunang ang buong populasyon ay bahagi ng armadong hukbo ng bayan.

6. Lipunang ipinatutupad ang ganap na demokrasya sa pamamagitan ng direktang partisipasyon ng bawat tao sa gobyerno at sa lahat ng usaping hinaharap ng lipunan.

7. Lipunang ipagkakaloob ang lahat ng pangangailangan ng tao - trabaho sa lahat, libreng pabahay, libreng edukasyon sa kabataan, libreng gamot at pangangalaga sa kalusugan, at marami pa. Ang mga ito ay hindi pribilehiyo kundi karapatan ng bawat mamamayan.

8. Lipunang ang mga pagawaan ay patatakbuhin ng mga manggagawa mismo (workers' self-management).

9. Lipunang ganap na magpapalaya sa kababaihan mula sa pang-aapi sa pagawaan at sa loob ng tahanan.

10. Lipunang bibigkis sa pinakamalawak na pagkakaisa ng buong sangkatauhan.

Pahayag ng mga Prinsipyo (KPML)

mula sa Saligang Batas ng KPML, Artikulo 2

Seksyon 4. Bilang sosyalistang organisasyon, itinatakwil ng KPML ang pribadong pagmamay-ari ng mga kasangkapan sa produksyon, dahil ito ang pinag-uugatan ng malaganap na kaapihan, kahirapan at pagsasamantala ng tao sa kapwa tao.

Seksyon 8. Naniniwala ang KPML na maaaring baguhin at lumaya ang mamamayan sa kahirapan at kawalang katarungan kung ganap na maitatayo ang isang sosyalistang lipunan at paglikha ng yaman na aariin ng lahat sa halip na iilan lamang at magkaroon ng tunay na kasaganaan para sa lahat ng mamamayan.

Seksyon 9. Naniniwala ang KPML na ang isang sosyalistang kaayusan ay matatamo lamang sa pamamagitan ng mahigpit na pagkakaisa, sama-sama at tuloy-tuloy na pagkilos ng mga maralita ng lunsod, ng mga manggagawa, at ng buong sambayanan.

Mula sa Praymer ng PLM (Partido Lakas ng Masa)

7. Bakit partido ng sosyalismo?

Naniniwala ang PLM na ang kapitalismo ay isang bulok na sistema na dapat lamang palitan ng sistema ng sosyalismo. Ang kapitalismo ay isang sistema na nakapundar sa tubo at paghahangad ng kapitalista ng limpak-limpak na tubo, nakapundar sa pag-aari ng iilan sa kasangkapan para sa paglikha ng yaman at ng lahat ng yamang nalilikha nito, nakapundar sa pagkakahati-hati sa tao sa mga uri (mayaman at mahirap, may pag-aari o wala).

Ang sosyalismo ang kabaligtaran nito. Isang sistema na nakapundar sa pagtugon sa lahat ng pangangailangan ng tao, sa pag-aari ng lahat ng lahat ng kasangkapan sa paglikha ng yaman at ng yamang nalilikha nito, at ang pagbabaklas sa anumang pag-uuri sa mga tao na nagnanakaw ng kanilang dignidad at seguridad sa lipunan.

Ang sosyalismo rin ang kumakatawan sa internasyonalismo, sa tunay na pakikipagkapatiran ng mga manggagawa at anakpawis sa mga manggagawa at anakpawis ng buong mundo. Binabaklas nito ang sistema ng pagkakanya-kanya o pag-iisip lamang ng mga tao sa batayan ng sariling interes, sariling grupo, o sariling bayan. Ang sosyalismo ay pagsasama-sama ng lahat para itayo ang makatarungan at masaganang kaayusan na wawakas sa imperyalista, kapitalista at lahat ng anyo ng pagsasamantala at pang-aalipin sa daigdig.